Дёртюнчю акт
Биринчи сагьна
(Фра Лоренцону кельясы. Фра Лоренцо ва Парис геле.)
Лоренцо. Хамисгюн, мессир? Кёп тез чи гёрюне!
Парис.
Шолай сюе къайнатам Капулет де:
Мен де шогъар гьеч къаршылыкъ этмеймен.
Лоренцо.
Айтдыгъыз чы синьораны пикири
Сизге белгили тюгюл деп. Болса да
Сизин арагъыздагъы бир тенгсиз дав.
Маслагьат гёрмеймен, синьорум.
Парис.
Тибалт оьлген сонг, ол токътавсуз йылап тура.
Шону учун аз сёйледим шону булан.
Сюймек гьакъындан. Яс болгъан бир уьйде
Ер тюгюл ятланы кюлемсиремеги.
Тек атасы шону ойлай чы, падрем,
Шолай къайгъырмакъ шогъар бек къоркъунч деп,
Сонг оьзюню терен гьакъылы булан,
Къошулмагъыбызны бизин чалт этмеге,
Гёзьяшларыны ташгъынын гесмеге
Гьукму этди: оьзбашына къопгъан йылав
Гёзьяшларын баргъан сайын кёп тёге;
Бир ёлдаш болса чы шолар тез къуруй.
Гьали сизге англашылгъандыр шу чалт
Бизин къошмакъ тоюбузну болмагъы.
Лоренцо (оьз-оьзюне). Шу ишни къоймакъ себебин билмесем! (Эшитдирип) Муна, мессир, оьзю синьора да геле.
(Жульетта геле.)
Парис.
О, насипли ёлугъув, азизим,
Синьора ва мени азиз къатыным!
Жульетта. Къатыныгъыз болурман, эрге гелсем.
Парис.
Дюр дагъы сен гележексен хамисгюн,
Мени сюйгеним.
Жульетта. Не болса, шо болур.
Лоренцо. Белгили ва гьакъ герти бир сёз айтдынг.
Парис.
Товба этмеге пир атаны янына
Гелген бусагъыз ярай.
Жульетта.
Шогъар жавап
Сизге бара бусам, гелмес эдим мен
Муну янына, гелир эдим…
Парис.
Тек, тилеймен, яшырмагъыз сиз мундан
Мени сюегенигизни.
Жульетта. Ону сюегенимни сизге айтаман.
Парис. Мени сюегенигизни айтамусуз?
Жульетта.
Шолай буса да, айтмагъым о якъда
Артыкъ тувра бетге айтмагъымдан эсе.
Парис.
О, пакъыр! Бетинг гёзьяшлардан азгъан,
Бузулгъан.
Жульетта.
Гёзьяшлагъа осал тюшюм…
Шоланы ташгъыны бузгъунчагъокъ да
Шу бетим кёп урусбай тюгюл эди.
Парис. Шогъар йылавдан эсе шу сёз зарал.
Жульетта.
Ялгъан айтмайман, мессир, герти айтаман.
Гьар не айтгъан бусам да оьзюм айтгъанман.
Парис.
Сени бетинг — меники, сен шогъар да
Бугьтан айтасан!
Жульетта.
Шолайдыр дагъы: бет меники,
Пир атам! Тынглама заманынг бармы?
Яда ахшам гелейими янынга?
Лоренцо.
Гьар заман — мени, амалсыз яшым!
Гьазирмен. Синьорум: бираз замангъа
Шуну булан биз бираз къалмалыбыз.
Парис.
Аллагь сакъласын шайыхны сыйлы ишин!
Жульетта! Хамисгюн эртен мен сизин
Уятарман. Шо эртен болгъунчагъа
Савболугъуз. Сизге менден пир оьбюш!
(Гете.)
Жульетта.
Тез бегит шу эшикни, сонг биз бирге
Йылайыкъ. Не умут ёкъ, не де гечмек,
Не кёмек ёкъ, не оьлюмден къутгъарыв!
Лоренцо.
Агь, билемен шу къайгъынгны, Жульетта!
Башымдагъы ойну да шо бек алды.
Мен эшитдим — хамисгюн шу графгъа
Эрге сени бережек деп, алгъасап?
Жульетта.
Шону магъа айтгъынчагъа, о падре,
Алдын сен магъа къутгъарылмакъ гьакъындан
Гьакъыл уьйрет! Сени терен гьикматынг
Гьеч чара табып болмай буса, шогъар
Мен этежек ишимни сен гьалал эт, —
Бир мюгьлетден тамагъымны соярман…
Ромеону да, мени юрегимни де
Кёк къошгъан къолумну шогъар бермеге
Сен гьалал этдинг. Гьали буса мени
Башгъа биревге бермеге сюелер.
Антыма хыянат этме сюелер.
Арты муну не болур? Мен тилеймен,
Сёйле кёп йыллар алгъан гьикматынгдан.
Сени кёп йылгъы къазангъан гьикматынг
Намусунгдан гьукму гесме болмаса,
Арабызда мени де, балагьны да
Тёре этежек магъа къанлы хынжал бар.
Жавапны бер тез: гьали сен айтгъанынг
Магъа къутгъарылмагъа бир эп бермесе,
Геч болмайым оьлюмге.
Лоренцо.
Токъта, къызым!… Бир умутгъа ошайгъан зат
Оюма гелди. Амма тюгеллемек,
Оьлмек даражада йимик бек къыйын.
Граф Парисге бармакъдан оьлмекни
Бойнунга алмагъа оьзюнг гюч тапгъан сонг,
Мен айтажакъ ишни де ал сен бойнунга.
Жульетта.
Парисге бармас учун, магъа буюр
Шо къаланы тишлеринден учмагъа,
Къачакълар болгъан ерден айланмагъа,
Бир йылан тешикге гирип гетмеге,
Акъырагъан аюв булан турмагъа,
Чирик эт гесеклер саллангъан, сасыгъан
Склеп толгъан дыр-дыр шакъырлайгъан
Адам сюеклени тюбюне гирмеге,
Шолар булан бир гебинни гиймеге…
Гьар-бир ишни, гьар нени де сен буюр,
Алдын мен титиремей тынглап болмагъан
Къоркъунчланы магъа буюр этмеге, —
Кирпик къакъмай ва къоркъунмай этермен.
Тек сюйген эриме гьалал кюйде
Къалмагъыма бир эп эт, о, пир атам!
Лоренцо.
Болса, тынгла: бар уьюнге, оьзюнгню
Шат гёрсет. Парисге барма рази бол.
Тангала арбагюн гече дигиза
Ятмасын уьюнгде сени. Ма шуну
Шу шишадагъы дарманны ичип ят!
Шундан тамурларынга тез яйылыр
Оьлюмню сувукълугъу ва сант юху:
Тамурларынгдагъы къанынг да токътар,
Къаркъаранг сувур, тынышынг гесилир:
Яшав аламатларынг да гьеч къалмас.
Эрнилерден ва этлерден ренг къачар,
Кюл тюсге гирерлер. Яшав ярыкъгъа
Гёз терезелеринг оьлюм япгъандай
Ябулур. Йелчен бар шу санларынг
Къатар, бузлар лап оьлю сурат алып.
Шу оьлюм гьалынгда сен къалырсан
Къыркъ эки сагьат. Эртен гелешмишинг
Сени уятмагъа гелгенде гёрюр —
Сени оьлюп ятгъанынгны ятывда.
Бизин адатлагъа гёре, сагъа инг асил
Опуракълар гийдирирлер, сонг элтерлер
Уьстю ачыкъ табутгъа сени салып,
Оьлген бары Капулетлени салагъан
Бырынгъы склепине. Мен де язарман
Ромеогъа кагъыз, — тез-тез гелсин деп.
Ол тез етер. О да, мен де уьстюнгде
Гёз уьзмей сагъа къаравул багъарбыз.
Сен уянгъанвулокъ алып, сени къачар
Мантуягъа Ромео. Муна шулай
Сен къоркъунмай этип мен айтгъанымны.
Къатынгиши йымышакълыкъны ташлап
Иш гёрсенг, сен къутулурсан хорлукъдан.
Жульетта. Бер магъа сен, бер! Къоркъувну сёйлеме!
Лоренцо.
Ма ал… Болса, бар! Оьзюнгню къатты тут
Насип берсин ишинге. Эринге де
Мантуягъа мен кагъыз язарман.
Монах булан йиберермен.
Жульетта.
О, сююм
Магъа къуват бер. Тек шо къуват мени
Къутгъарар. Савбол, пир атам.
(Гете.)