Еттилик

Бир керен биз яшлар еттев болуп гьавгъа гетдик. Гьавубуз да тюзелмей къайтып гелегенде, еттибиз де тарлавгъа гирип еттишер къартыкъ гъабижай алып, ёлубузну узатдыкъ. Къарайбыз, къаравулчу ёлубузну къыркъып токътагъан.

– Яшлар, сиз алып къойнуларыгъызгъа тыкъгъан бу гъабижай жамиятныки. Соравсуз-солгъусуз юлкъуп алып гетме уялмаймысыз! – деп айып этип де къоймады. Къошуну алдына элтип тёкдюртдю. – Биз де етти уьйню есиридей болуп къайтдыкъ, – деп кюстюндю магъа билдирмей гьавгъа деп гетип, уручу саялы тутулгъан жан къурдашым.

Жагърафия (география) китапда язылгъангъа гёре, алдагъы ССЖБ-ни (Совет Сосиалист Жумгьуриятланы Бирлиги) топуракъ майданы Гьиндни майданындан эсе етти керен (кёп) уллу болгъан.

Бир акъ сакъаллы атай:

– Эрши иш этип биябур болгъунча, етти къат ерни тюбюне батгъан да къолай! – деп къайнашгъан авлетини авлетине.

Етти атасына ерли атларын билмейген авлетлер ерге гирсин! (айтыв).

Яшлар, гьали етти аталарыгъызгъа ерли, олар кимлер болгъанны къайсыгъыз билесиз?

Юз элли суаллы Маликаны хабарындан.

Къыз: Етти зат етти затдан тоймай. Олар нелердир? – деп сорагъанда: – Гёзлер – къарамакъдан, къатынгиши – эргишиден, топуракъ – янгурдан, от – агъачдан, алим – илмудан, бай гиши – малдан, адам – яшамакъдан тоймай, – деп жавап берген алим.

Гьали «эмчилени» ёкъ этдик, аврувланы кёп этдик» деген баш булан язылып басмада чыкъгъан макъалагъа гёз къаратайыкъ. Мунда шулай язылгъан:

– Етти баш самурсакъны балгъа къошуп, ачкъарынгъа ашаса, хуртлар (сувалчанлар) ичинден къапчыгъы (дорбасы) булан чыгъар. Яда: улан япыракъдан чуду этип, етти керен ашаса, къурсакъ авруву токътар.

Къыз: Женнетни атлар нечедир? – деп сорагъанда:

– Сегиздир! – деп жавап берген алим.

– Ва женнетни атларын айт! – дегенде:

– Дару-Ссалам, Жаннатул-Ъадн, Ал-Жаннат, Жаннатул-Фирдаус, Жаннатул-Мава, Жаннатул-Гьулд, Жаннату-Ннаим, – деп жаваплангъан алим.

– Жагьаннемни атлар нечедир?

– Сегиздир, – деген ва «Ан-Нар, ал-Гьутама, Сакъар, Саъир, Лаза, ал-Жагьим, Жагьаннем, Дарул-Бавар – деп атларын да айтып берген.

Къарагъыз, дюньяда еттишер яхшылыкълар кёп.

Яшлар тувуп, етти гюнден бешикге салына.

Яшлар етти йылдан охувханагъа юрюме башлай.

Етти ини-агъа, оьмюрлери башгъа- башгъа.

Бу чечеген ёмакъны ким чечме бола?

Билдигизми?

Билмедигиз буса, айтып берейим.

Биринчиси – «Етти агъа-ини». Гьар жуманы гюнлери – етти гюн.

Атлары башгъа-башгъа демек, жуманы етти де гюнлерини атлары; итнигюн, талатгюн, арбагюн, хамисгюн, жумагюн, сонгъугюн, къаттыгюн.

Энемжая (солтанжая) – етти тюрлю тюслерден бола.

Энни сегизлеге де гечейик: