Buzaw, qozu wa börüler
Arslanbek degen gişini bir buzawu da, bir qozusu da bolğan. Bir gün olar otlawda otlay bolğan. Otlay turup, olar xıylı yerge yürügen. Yolda olar tawşan teri de tabıp, onu da qoltuğuna qısdırıp, yürüy bolğanlar. Yürüy turup, axşam bolğanın bilmey qala. O yerde bir töle bola. Olar şonda gire. Qarasa, içki içegen toğuz börü bar. Salam da berip, tawşan terisin de eşik artğa süyep, buzaw da, qozu da girip, bulanı yağında oltura.
Börüler qonaqların pisiremey, özleni qomuzçusuna ayta:
— Buzawğa soq, buzawha soq! — dep.
— Xinti-minti, xinti-minti, Qozu taman quşluqğa, Xinti-minti, xinti-minti, Buzaw taman quşluqğa,
— dep soğup, yırlay qomuzçu börü.
Olar özleni aşama süyegenni bilip, buzaw ayta:
— Berigiz, hali men de soğayım! — dep.
Börüler buzawnu bilegeni bolmasa da, bizge bir küleme zatdır aşağınça dep, qomuznu uzatalar. Buzaw soğa:
— Xinti-minti, xinti-minti, Toğuz teri — tonluğum, Xinti-minti, xinti-minti, Eşik artda — yağalıq!
— dep yırlay.
Börüler eşik artğa qaraylar — tawşan teri bar. "Ne güçlü canlardır bular! Bizin toğuzubuznu da öltürüp, terileribizden ton etme tura! Geligiz, qaçayıq!" — dey, bir-birine şıbışlap, turup toğuz da börü, qaçıp gete.
Soñ buzaw qozuğa ayta:
— Bular çı qaçdı, tek dağı da köp bolup gelir dep esime gele. Şo zaman bizin hillabız ozmas. Gel, mundan tayayıq, — dep. Olar töleden çığıp, bir terekge minip toqtay.
Bir zamandan börüler on eki bolup gele. Tölede bulanı tapmay, börüler gelip şo terekni tübünde aylanışalar.
Birden qozunu suw yarawu gelip yibere.
— İsewüm gele, ne eteyim? — dep soray bu buzawğa.
— Yerge tüşseñ, börüler seni aşap qoyar, bir butaqnı tutup sama et! — dey buzaw.
Qozu etme oñarılaman dep, butağı-zatı bulan yerge tüşüp gete. Börüler es tapğınça, buzaw es taba da, qozuğa qıçıra:
— Semizin tut, semizin tut! — dep. Börüler:
— Bular ne igit canlardır, qoyup sama tayayıq! — dep qaçıp geteler.
Buzaw terekden de tüşüp, qozu bulan birge tawşannı terisin de alıp, Arslanbekni abzarına qaytıp gele.
Oñmay-ösmey börüler qala, oñup-ösüp, genenip qozu da, buzaw da qala!