Толгъуйгъан ногъайлы

Гье-э-э-й… Абайымны уьюнде, Ай сувлудай эркемен де мен торкъаман. Тирменлеге тирлик тартма гелген еринде, Тоюгъузда толгъумагъа къоркъаман.

Тёрюгюзде тёнгекдей болуп къалгъанман, Терик сувлар ташып салгъан сёрюмдей. Толгъан тюбек йимик сюелип, Тоюгъузда Къазакъ неге гёрюнмей, ав.

Оьлген битмейген авлакъ да болмас, чёл болмас, Ел уьфюрсе чайкъалмайгъан да кёл болмас. Юрекдегин ятлар билсе сыр болмас, Юрекни тебип чыкъмагъан сёз йыр болмас.

Йырлар эдим сизге мен, къумукълар, йыр къапчыгъым сёгюлген, Йылланы бой жыйгъан йырым тёгюлген. Къазакъдагъы гюч де ёкъ мен, Ногъай да Къонакъ атлар къурсакъ этмес тогъайда.

Къазакъдагъы гюч де ёкъ мен, Ногъай да Къонакъ атлар къурсакъ этмеген тогъайда.

Гье-э-э-й, Яратгъаным бизге шулай ёрагъан: Ярлы ногъай юн тёлеме яралгъан, Яныкъ Мурзалар ёрмелеме яралгъан. Мендей йырав, ёрмеп авзун тиксе де,

Мендей йыравлар, ёрмеп авзун тиксе де, Сёз сёйлеме, йыр йырлама яралгъан.

Гье-э-э-й, йыры ёкъну тынгламагъа халкъы ёкъ, Халкъы ёкъну эркин уллу эли ёкъ. Эллерден элге эрсек йырлар элтеген Элигизде магъа ошагъан дели ёкъ.

Эрсек бийлер элден савут жыйгъан гюн, Эр уланлар савут такъмай ялкъгъандыр. Савутсуз къалгъыр къумукъ геделер, Савут этип Къазакъны йырын такъгъандыр.

Туралини тузун къуйса да, толмайгъан Тогъуз авузлу тузлакълар къайда, гён къайда. Толгъугъанда тюе кериван да токътатгъан Татар огълу Къазакъ къайда, мен къайда.

Толгъугъанда тюе кериван токътатгъан Татар огълу Къазакъ къайда, мен къайда.

Гьайт, уланлар, йыр терегини бутакълары булутда, Бутагъан ёкъ ону бий, хан болуп да. Йыр терегини тамурлары терендир, Тамурундан тартса тахлар тербенир.

Ювушанны да чала, йырны чалгъан ёкъ, Йылкъылайын огъар юген салгъан ёкъ. Ярдымлы бир Къазакъ йимик йыравланы кишенлеп Аллагьны дюньясы булан къалгъан ёкъ.