АТА ТИЛИНДЕН БАЛАГЪА

Ананг сююнгюр, балам,
Ал чы къолунга къалам.
Сукълансын сагъа алам —
Мактапгъа бар, мактапгъа.

Мактапгъа сал юрегинг,
Илму болсун герегинг,
Нюрленсин кёкюрегинг —
Мактапгъа бар, мактапгъа.

Шатлыкъ этейим мен де
Сен мактапдан гелгенде,
Миллетни гёзю сенде —
Мактапгъа бар, мактапгъа.

Миллетинг къарай сагъа,
Кёп затлар ёрай сагъа,
Мактапдан сарай сагъа —
Мактапгъа бар, мактапгъа.

Эт чи миллетни гьайын,
Оьрленсин гьар гюн сайын,
Эшит Ватан гьарайын:
Мактапгъа бар, мактапгъа.

Ватан дертине къара:
«Языкъман», — деп ялбара,
Мактапдан излей чара —
Мактапгъа бар, мактапгъа.

Дагъыстанны адатын
Унутма гьар-бир затын —
Тиргиз аталар атын —
Мактапгъа бар, мактапгъа.

Мактап — илму булагъы,
Талайсызлар йырагъы,
Янсын миллет чырагъы —
Мактапгъа бар, мактапгъа.

Инан, аявлу, магъа —
Миллет таянгъан сагъа,
Бир кёмек излей багъа —
Мактапгъа бар, мактапгъа.

Тынгла, балам, ананга:
Юрю мактапхананга,
Ярыкъ бер айлананга —
Мактапгъа бар, мактапгъа.

Тут жагьил халкъны къолун,
Гёрсет яшавну ёлун,
Билсинлер онгун-солун,
Мактапгъа бар, мактапгъа!

(«Маариф ёлы». Буйнакск, 1925 й. № 7—8, 37 б.)