Агъасы Абулхайыргъа язгъан кагъыз

Адреслери: Северный край Вологодского округа, село Леденское, Кооперативная улица, № 67, Абухаиру Акаеву. Станция Пинюг Пермской железной дороги, 8-й рабочий пункт, Акаев Абусупьян.

«Аввал Абулхайыргъа, сонг бары да ёлдашларынга, хасокъда — Бамматгъа, кёпден-кёп салам.

Сонг, мурадым — сиз сав-саламат болмакъсыз. Мен де, алгьамдулиЛлагь, сав-саламатман. Перимский вилаятда Пинюг деген вокзалдан башланып ишлене турагъан темир ёлдагъы лагерлерден сегизинчи лагердемен. Сизин булан аралыкъда от арбагъа эки гече эки гюнлюк ёл болмагъа ярай. Эки ай, уьч ай тюгюл эсе, бир ерде къалмайбыз. Гёче турабыз. Дагъыстанлы ёл- дашлагъа бир къошула, бир айрыла болабыз. Сиз…^✻ сюргюн болмагъа ярайсыз. Биз тюгюлбюз. Тюгюл бусакъ да, бизин йимик къарт гишилеге къыйын ишни буюрмайлар. Аз-маз енгил ишлейбиз. Бизге он йыл сибир гесгенлер. Бугюн бир аварлы, бир тузакъкъарлы^✻ ёлдашлар буланман. Къазанлы ёлдашлар чы кёп. Котлус^✻ деген машгьюр шагьарны алты сагьатлыкъ къыбла ягъындабыз.

Абусупьян. 10 сентябрь 1931»