Uçurtmağa süye busañ, aeroportğa çap, aeroportğa…
Haci Haci Ötemişli
Xıylı yıllar haydawçu bolup işlep gelgen Dahir, birden, esde-pusda yoq yerden, qıtlıqnı sebebinden kadrlanı qısğartıwuna tüşüp, işsiz qalğanına neçe de köp incindi. İş izley ol şaharnı içinde barmağan heç transport idara qalmağan.
Bir gün axşam, işge baylawlu oylarına çomulğan Dahir, diwanda yantayıp televizorğa qarayğanda, onu ekranında çabıwul kälimalar «Sınawlu haydawçu tarıq» degen bildiriw reklama çıqğanda, süyünüp geçesin neçik ötgergenni bilmedi.
Ne busa da, erten işge umutlu bolğan Dahir süyünmeklikden aş da xapmaylı, haydawçu şahatnamasın da alıp, iş talap etegen idarağa alğasadı.
İşge alğasağan Dahirni yüregi çalt işlep başladı. Haleklengen yürek köküregini içinde sıyışmayğan darajağa çıqğanın sezdi.
Masxara tügül çü, saw yılnı uzağında işlemey, üyde yatıp, iş tabıp bolmayğan sayalı, üydegilerden tügül, tışdağılardan da uyalağan bolğan edi. Hali busa, Allahğa şükür, işge çaqıra. Ne yaxşıdır!
«Qısmatım terbeñenge» oşay dep oylaşğan Dahir, neçik olay bolsa da, özün yañı «KämaZ» maşinini köküreginde olturup, rulnu qoluna tutğanday sezdi. Miyin şolay oñlu oylağa yeletgen Dahir, transport kansaralnı aldına neçik yetişgenin añlamadı.
Transport işxananı direktoru Mawletxan Dahirni iliyaqlı irjayıp, qaynar qarşıladı. Bir başlap özün qabul etgen küyge razi bolğan Dahir hayranlıqğa tüşdü. «Bu eliwaş, bulğawur zamanlarda bulay rahmulu, adamlığı saqlanğan yolbaşçılar da tabıla eken. Men turadım, olanı urluğu üşüp bitgendir dep. Bitmegen eken» - dep oylaşğan Dahir rahatlıqğa tüşdü.
— Qayda, arzañı görset, — dep Mawletxan Dahirge tergewlü qarawun tikdi. Soñ qolundan Dahirni arzasın alıp, onu oxuma çı qaydan oxusun, oğar burulup sama qaramaylı bulay dedi.
— Köp ariw. Köp ariw. İşleme süyegeniñ köp ariw. İşleseñ, neçe de ariw bolajaq. İşge hawaslığıñ barlığın tas etmegeniñ neçe de ariw. Yürekni olay hal quwandırmay bolmay.
«Ariwleni artı-aldı bolmaymı. Men işge alğasap ölemen, sen busa, ariwleriñden qoynumnu tolturup barasan. Küyge qarağanda, körüknü basmağa ustalığıñ barğa oşay», — dep oylaşğan Dahirge Mawletxan birdağı keren:
— İşni sağınğanıñ köp ariw. İş axtarıp bizge gelgeniñ köp ariw, - dep qolundağı arza kağıznı bir tamaşa bulğap aldı. Soñ Dahirge birdağı tiklenip qaradı da, sözün dawam etdi.
— Maşinleni alda da ariw haydap gelgensendir. Haydağan busañ da, olanı türlü-türlü markaların haydağansandır, - dep suallanı art-artına tağımlap, tögüp qoydu.
Mawletxannı ariwlerinden tüünğan Dahir:
— Haydağanman, köp ariw haydağanman. Haydama tügül uçurtup da gelgenmen. Tarıq bolsa, uçurtup da bolajaqman. Neçe de ariw uçurtma da uçurtajaqman. Yeri gelse, hatta yelden de ozdurajaqman, — dep cawaplandı.
— Maşinleni uçurtmağa pahmuñ bar busa, aeroportğa çap, qulum, aeroportğa. Kökden uçağan qanatlı maşinler onda bola. Bizde dögerçikli, yerden yürüygen maşinler tügül yoq, — dep, Dahirni işge almajağın añlatğan Mawletxan, eşikge tüz bolğan Dahirni sırtına qarawun tikledi.