Расулгъа алайгьиссалам Макка агьлю къаст этмеги

Тюрлю къыйынлыкъ бугъар
Макка агьлю гёрсетдилер^✻;
Юрегин шайтан бийлеп,
Ёлсуз ишлер этдилер.

Оьлтюрме къаст этдилер,
Якъ-ягъындан айланып.
Бир зат бажармадылар,
Гёзю-къолу байланып.

Нечик зиян этежек –
Аллагь бугъар кёмекчи;
Жумла халкъдан сыйлы этип,
Оьзю йиберген Элчи.

Бирлер – «гёзбавчу» деди,
«Жинли» – деди бирлери.
Юрекде тамурлашгъан
Мюшриклени^✻ кирлери.

Бирлер, гертисин билмей,
Дин учун деп этдилер;
Бирлери, биле туруп,
Терс ёллагъа гетдилер.

Сонг кафирлер ойлашды,
Жыйылышып бир ерге,
Буланы арасында
Иблис-маълюн де бирге.

Оьзю билеген сёзню
Сёйледилер гьар бири.
Сонг Абужагьал^✻ сёйлеп,
Къабул болдулар бары.

Ол маълюн шулай айтды:
«Биз муну оьлтюрейик,
Гьар гюпден бир йигитге^✻
Къылыч савут берейик.

Тегиш бары да^✻ уруп,
Расулну оьлтюрсюнлер,
Динине къайтгъанлагъа
Кёп хорлукъ гелтирсинлер.

Мунчакъы кёп табунну
Боламу къанын тутуп;
Къан тёлевюн берербиз,
Къоярлар сонг унутуп.

Къай^✻ бирине ябушур
Расулну къардашлары».
Бу сёзге рази болду
Мюшриклени башлары.

Сёзлери шогъар токътап,
Ахшам болду, гюн батды,
Ухласа^✻ оьлтюрмеге
Къаст этип, сакълап ятды.

Салат саламлар болсун –
Расулгъа, агьлусуна,
Сыйлы асгьапларына,
Яшына-уллусуна!