Арапча дуаланы таржамасы

Бисмиллагьи ррагьмани ррагьим.

Алгьамдулиллагьи раббил аламин. Вассалату вассалам ала сайидина Мугьаммадин ва ала алигьи ва асгьабигьи ажмаъин. Амма баъду.

Ай дин къардаш! Арапча охулагъан дуа йимик затланы маънасын билмесе, пайдасы болмас деп айтылагъан сёзлер де болмакъ себепли, шу гиччирек китапда бизин жагьиллени авзунда намазда болду, оьзге ерде болду, юрюлеген арапча затланы маъналарын язгъанбыз. «Сафинат ун-нажатда»^✻ язарбыз деп этген ваъдабыз да бар эди...

Алгьамны^✻ маънасы.

Мен Аллагъу таала булан сакъланаман, оьзюне лаънат этилген^✻ шайтандан. Аллагъу тааланы аты булан башлайман. Алай Аллагь — ол да оьзю къулларына бек языкъсынагъан. Гьар макътав Аллагъгъадыр, бары халкъны яратып, сакълап турагъан, оьзю бек языкъсынагъан, къыямат гюнню есси болгъан! Сагъа къуллукъ этебиз, Аллагь, сенден кёмек де далаб этебиз: бизин тюз ёлгъа тюз эт! Сен оьзлеге ниъмат бергенлени ёлуна тюз эт! Сен оьзлеге ачувлангъан жугьудлардан гьайрыланы^✻ ёлуна тюз эт! Оьзге адашгъан имансыз къавумлардан да гьайрыланы ёлуна тюз эт!

Къулгьуну^✻ маънасы.

Бисмиллагьи ррагьмани ррагьим.

Сен айт, пайгъамбар: «Ол Аллагъу таала бирдир. Аллагъу таала — гьар ким оьзюне гьажатлы болагъан бийдир. Оьзюнден гьеч зат тувмагъандыр, гьеч затдан оьзю де тувмагъандыр. Гьеч оьзюне тенглик этеген гиши де болмагъандыр»,— деп айт.

Аттагьийятны маънасы.

Мубарак^✻ болгъан макътавлар, таза болгъан намазлар да — Аллагъу таалагъадыр! Саламатлыкъ сагъа болсун, ай пайгъамбар, Аллагьны рагьматы да, берекетлери де болсун! Саламатлыкъ бизге де болсун, Аллагъу тааланы салигь къулларына да болсун!

Мен шагьатлыкъ этемен: оьзюне тийишли болуп къуллукъ этилинеген зат — Аллагьдан башгъа ёкъдур деп. Ва дагъы да мен шагьатлыкъ этемен: Мугьаммад — Аллагъу тааланы элчи пайгъамбарыдыр деп.

Я Аллагь, Мугьаммад пайгъамбаргъа рагьмат эт, аны уьй агълюсюне де рагьмат эт, Ибрагьим пайгъамбаргъа да, агълюсюне де рагьмат этген йимик! Мугьаммадны да, агълюсюню де сыйлылыгъын даим эт, Ибрагьимге де, агълюсюне де этген йимик! Бар да халкъны ичинде сен макъталгъан гишисен, уллу гишисен.

Аллагьуммагъдинаны маънасы.

Сен мени тюз эт, Аллагь, сен тюз этгенлер булан бирче! Сен магъа савлукъ да бер, сен савлукъ бергенлер булан бирче! Сен магъа ювукъ гиши де бол, сен оьзлеге ювукъ болгъанлар булан бирче! Сен магъа берекет де бер! Сен магъа берген затда сен мени сакъла, сен къадар этген яманлыкъдан! Сен гьукму этесен, сагъа гиши гьукму этмей. Сен оьзюне ювукъ болгъан гиши эксик болмас. Сен душманлыкъ этген гиши сыйлы да болмас.

Сен таза болдунг, Аллагь, бийик де болдунг, сагъадыр бар да макътав! Сен къаза этген зат учун мен сенден гечмакъны далаб этемен.

Намазны ичиндеги бир-нече дуалар.

Аллагъу таала сыйлылыкъ ягъындан гьар бир затдан уллудур. Аллагъгъа кёп макътав! Аллагъу тааланы гавурлар айтагъан сыпатлардан таза этемен. Эртен де, ахшам да мен оьзюмню бакъдырдым кёклени-ерлени яратгъан Аллагъу таалагъа. Оьзге динлерден тайып бусурман болгъан гьалда мен имансызлардан тюгюлмен. Мени намазым да, оьзге къуллугъум да, оьлмагъым да, мени савлугъум да — бар да халкъны яратып сакълап турагъан Аллагъу таалагъадыр.

Огъар ортакъчы ёкъдур. Магъа шолай буюрулгъан. Мен де бусурманларданман.

Мени уллу болгъан Аллагьымны мен имансызлар айтагъан затлардан таза этемен.

Макътагъан гишини макътавун Аллагъу таала къабул эте. Ай бизин Аллагьыбыз, сагъадыр гьар макътав — кёклер толур чакъы, ер толур чакъы, дагъы да оьзюнг сюйген зат толур чакъы да! Мен оьр болгъан Аллагьымны таза этемен.

Ай Аллагьым, менден геч, рагьму да эт, нукъсанларымны да ялгъа, мени оьр де эт, мени тюз ёлгъа да сал, магъа савлукъ да бер!

Намазны артындан охулагъан тасбигьлени^✻ маънасы.

Аллагъу таала уллу. Аллагъгъадыр гьар макътав! Мен Аллагъу таала менден гечмакъны тилеймен! Ай Аллагьым, сен гьар нукъсанлыкъдан таза гишисен. Балагьлардан саламатлыкъ да — сендендир. Сен таза болдунг, ай уллулукъну да, сыйлылыкъны да есси Аллагь!

Оьзюнден башгъа тийишли болуп къуллукъ этилинеген зат ёкъ болгъан Аллагъу тааланы аты булан башлайман. Мен шагьатлыкъ этемен: тийишли болуп къуллукъ этилинеген гьеч зат ёкъдур ол Аллагьдан башгъа деп. Бек языкъсынагъандыр Аллагъу таала.

Я Аллагь, менден къайгъыланы да балагъын да гетер, пакъырлыкъны да балагъын да гетер! Дюньяда да, ахыратда да, ай рагьму этегенлени артыгъы... (муну маънасы альякъда гетди^✻).

Я Аллагь, магъа кёмек эт, сени эсгермакъ учун, шукр^✻ этмакъ учун да, сагъа яхшы кюйде къуллукъ этмакъ учун да!

Намазгъа жувунмакъдагъы дуалар.

Я Аллагь, мен сени булан сакъланаман имансызлыкъдан да, пакъырлыкъдан да, къабурну азабындан да, ай Аллагь! Тийишли болуп къуллукъ этилинеген зат Аллагьдан башгъа ёкъ. Оьзюне ортакъчы да болмай, янгыз болгъан гьалда мюлк анакъыдир. Бары макътав да огъардыр! Ол Аллагъу тааланы гьар заттгъа гючю етишедир.

Я Аллагь, сен берген затны гери урма болагъан ёкъ, сен гери ургъан затны берип болагъан да ёкъ. Сен къаза этген затны къайтарып болагъан да ёкъ. Сени янынгда бай гишиге байлыгъы пайда этмей.

Ай мени Аллагьым! Яман гьалдан яхшы гьалгъа таймакъ да ёкъ, оьр болгъан, уллу да болгъан Аллагъу таала булан тюгюл эсе. (Маънасы альякъда гетди^✻). Гьар ниъмат онукидир, сыйлылыкъ да огъардыр, арив макътавлар да огъардыр! (Маънасы маълюм^✻). Ол Аллагъу таалагъа ибадат этебиз, гавурлар нечакъы сюймесе де.

Аллагъу таала оьзюнден башгъа Аллагь ёкъдур, тиридир, халкъына бек тадбирлидир^✻; оьзюне къалгъымакъ-юхламакъ да болмайдыр: кёклердеги де, Ердеги де зат оьзюникидир; оьзюню ягъында гишиге шапаат этип болагъан ёкъдур, Аллагъу тааланы изнусу булан тюгюл эсе.

Ол Аллагъу таала биле, халкъны алдындагъыланы да, артындагъыланы да. Аллагъу таала билеген затланы гьеч бирин халкъ билмей, Аллагъу таала оьзю билдирме сююп билдирген затны тюгюл эсе. Аллагъу тааланы кюрсю^✻ кёклени-ерлени къуршады. Ол кёклени де, ерни де сакъламакъ Аллагъу таалагъа авур болмай. Ол Аллагъу таала бийик де, уллу да гишидир.

Намазгъа жувунмакъдагъы дуалар.

Я Аллагь, мени бетимни акъ эт сени нюрюнг булан, бир-бир бетлер акъ болагъан гюн, бир-бир бетлер къара да болагъан гюн.

Я Аллагь, мени китабымны бер онг ягъымдан, магъа енгил гьысап да эт! Я Аллагь, мени китабымны берме сол ягъымдан, аркъа ягъымдан да берме!

Я Аллагь, сен гьарам эт — тюгюмню де, теримни де жагьаннемни отуна гьарам эт!

Я Аллагь, мени аякъларымны токъташдыр Сират кёпюрню уьстюнде, анда аякълар тайгъалайгъан гюн! Мен шагьатлыкъ этемен: тийишли болуп къуллукъ этилинеген зат — бир Аллагьдан башгъа ёкъ деп, оьзюне ортакъчы да болмай янгыз болгъан гьалда. Дагъы да мен шагьатлыкъ этемен: Мугьаммад да — ол Аллагъу тааланы къулудадыр, элчи пайгъамбарыдадыр деп.

Сен мени эт Аллгь — сагъа къайтагъанлардан да эт, сени тазалардан да эт, сени салигь къулларынгдан да эт! Мен сени нукъсан сыпатлардан таза этемен.

Я Аллагь, сагъа макътав да этемен, сенден башгъа Аллагь ёкъ деп шагьатлыкъ да этемен, сенден гечмакъны далаб этемен, сагъа да къайтаман.

Я Аллагь, мени къолларымны сакъла асси ишлерден!

Я Аллагь, магъа сен нийислет женнетни ийисин!

Я Аллагь, мени эт ол гишилерден — сёзню эшитип яхшысына табиъ болагъан!

Эшикге олтурмакъдагъы дуалар.

Аллагьны аты булан башлайман. Я Аллагь, мен сени булан сакъланаман — эркек болду, тиши болду — шайтанлардан.

Сен менден гечмакъны далаб этемен. Гьар макътав — менден зарарлы затны тайдыргъан Аллагъгъадыр, магъа савлукъ да берген Аллагъгъадыр!

Намаз чакъырмакъ — къамат^✻ этмакъ.

(Намаз чакъырмакъны да, къамат этмакъны да сёзлеринден хыйлысыны маънасы альякъда гетген сёзлерден билине. Билинмейгенлерин язабыз):

Намазгъа гелигиз! Талайлы болмагъа гелигиз! Намазгъа турулду! Аны Аллагь тургъузсун, даим де этсин! Намаз — юхудан яхшы! Герти айтдынг, яхшы да этдинг! Халкъны жыйылгъан гьалда къылынагъан намазгъа гьазир болугъуз!

Я Аллагь! Ай шу тамам болгъан чакъырмакъны да есси Аллагь! Ай шу турулгъан намазны да есси Аллагь! Мугьаммад алайгьи ссаламгъа женнетге болгъан даражаны бер, сыйлылыкъны да бер, бийик болгъан даражаны да бер! Сен аны да йибер сен ваъда этген шапаатны макъамына^✻! Бизге аны шапаатын насип де эт къыямат гюн, сен ваъдагъа хилаф^✻ болмайсан.

Къуръандагъы сужданы дуасы.

Мени бетим сужда этди оьзюню яратып сурат этген Аллагъу таалагъа, оьзюню къулагъын-гёзюн ярып да ачгъан гишиге — ай Аллагъу таалагъа, оьзюню гючю-къувваты булан ачгъан.

Янгур тилемакъны дуасы.

Я Аллагь, бизге ичир янгурну! Алай янгур ол да — оьзю къыйынлыкъдан къутгъарагъан, къутлу болгъан, яхшы сингеген, отну обсдюреген, кёп болгъан, кёкню юзюн толтурагъан, агъагъан, гьар ерге етишеген, къуршайгъан, гьажат биттгенче даим къалагъан.

Я Аллагь, бизге янгур бер! Бизин умут уьзгенлерден этме! Биз сенден гечмакъны далаб этебиз, Аллагь, сен гечеген гишисен. Сен янгур бер бизге — кёп болгъан гьалда!

Я Аллагь, бизге мунпаатлы^✻ янгур бер! Биз янгурлу болдукъ, Аллагьны чомартлыгъы да, рагьматы да булан.

Я Аллагь, бизин айланабыздагъы тавлагъа-агъачлагъа явдур, бизге явдурма!

Гьар ерде бири болагъан увакъ дуаланы маънасы.

Ай бизин ессибиз Аллагь, бизге бер — дюньяда ниъмат бер, ахыратда да женнет бер! Бизин сакълама да сакъла жагьаннемни азабындан!

Ай Аллагь, биз инандыкъ сен тюшюрген Къуръангъа, сен йиберген пайгъамбаргъа да табиъ болдукъ. Бизин шагьатлар булан бирче яз!

Ай Аллагь, сен къынгыр этме юреклерибизни! Бизин сен тюз этгенден сонг, бизге сени ягъынгдан рагьмат да бер! Сен рагьмат берегенсен.

Ай Аллагьыбыз, бизден къабул эт намазыбызны, оразабызны, оьзге амалларыбызны да! Аллагьны имансызлар айтагъан нукъсан сыпатлардан таза этип, «субгьаналлагь»^✻ деп айтаман — бар да махлукъатыны санаву чакъы, оьзю рази болур чакъы да, Аршны оьлчевю чакъы да, оьзюню калималары язылса тарыкъ болагъан шакъыны къадары чакъы да.

Я Аллагь, биз женнетни тилейбиз сенден, сени булан жагьаннемден де сакъланабыз.

Я Аллагь, сен гечеген сыйлы гишисен, гечмакъны да сюесен. Бизден геч, ай сыйлы Аллагь!

Я Аллагь, сагъа ораза тутдум, сагъа иман да салдым, сагъа бусурман да болдум, сени рызкъынгда оразамны да ачдым, тангала ораза тутмагъа негет де этдим.

Рагьмат эт, Аллагь, бийибиз Мугьаммадгъа, аны уьй агълюсюне де саламатлыкъ да берсин!

Бизин къутгъар, Аллагь, жагьаннемден! Мен Аллагъгъа тавба Аллагъгъа къайтдым гьар гюнагьдан. Биз Аллагьныкибиз, биз ол Аллагъгъа да къайтажакъбыз. Сагъа Аллагь рагьму этсин, сени Аллагь тюз этсин, Аллагъу таала рагьмат этсин, ол пайгъамбаргъа саламатлыкъ да берсин!

Танбигь^✻.

«Субгьаналлагь» йимик, «Ла илагьа иллаллагь» йимик, «Ла гьавла ва ла къуввата илла биллагьил алийил азими» йимик хыйлы затланы маъналары альякъдагъы дуаланы арасында гетди. Акътарып къарамагъа герек.

Жаназа намаздагъы дуаланы маънасы.

Я Аллагь, сен геч бизин савбуздан, оьлюбюзден де, ювукъдагъыбыздан да, йыракъдагъыбыздан да, гиччибизден де, уллубуздан да, эркегибизден де, тишибизден де! Я Аллагь, бизин савларыбызны ислам динде сав эт, бизин оьлгенлерибизни де иман булан оьлтюр! Я Аллагь, бу гишиге намаз къылмакъны савабындан^✻ бизин магърюм этме! Муну артында бизин питнеге де салма! Бизден де, андан да гечме де геч!

(«Гьаза арапча дуаланы таржамасы ва ажам мавлед». Темирханшура, 1914 й., 2—10 б.).

⁂