Мен Оьктеммен

(Умукюрсюнню тилинден)

Мен оьктеммен, оьктеммен! Оьктемлигим булан нетмен мен? Геме тёшлю гери алашам бар чакъы Гемелер агъып гетсе, гетмен мен. (Къазакъ йырдан)

Уланын макътамакъ къумукъларда айып зат. Эрин чи оьлген сонг макътап да йибере. Уланымны да макътамасам ярай эди, ол янгыз меники болуп токътагъан эди буса. Ол янгыз меники болгъан эди буса, уьйде тёшекде ятып оьлер эди.

Гюлле ону эки де ал тишинден тийип, елкесинден чыкъгьан эди. Душмангъа сыпатын шонча да бек тутуп оьлген улан бар сагъа о.

Душманлар ону авзуну ичине урмакълыкъны кёп уллу маънасы бар. Душман болгъан булан да олар онча гьакъылсыз болмагъан.

Къайырмас. Яман чы бар эди: атасы да, уланы да тогъас тюпде оьлген эди буса.

Мен уланымны гёмген гюн акъ къазакълар уланымны атасын оьлтюрген гюн эди. Уланыма къазылгъан къабургъа ону атасы гёмюлмеге тюшдю.

Яра сав бола турагъанда бек къычыта. Шону сыйпай турса юрекге тамаша бир яллыкъ бола. Уланын да, ону атасын да душманлар оьлтюрмеклик анасына уллу яра тюгюлмю? Герти ону тамгъасы къалгъан. Тамгъасы да таяр йимик олай гиччи яра тюгюл эди чи дагъы о.

Шогъар гёре шо эсги яраны сыйпай турагъан кююм бола. Айып этмегиз, яшлар, янгъан сёйлер, ягъындагъы тынглар дей.