BEŞİK YIRLAR
Balam balqıy bal ala, Bal ala bola bala, Balawuz sıtıp bala, Balnı awzuna sala.
⁂
Cıqı-cıqı bu arba Cıqıllasın bu arba. İş süymesge — yumuruq, Bizge tüşsün qaq quyruq.
⁂
Üyüne qaytmağannı Üyün çıçqan talasın. Xadirasın-xumasın. Bizin mişik yalasın
⁂
Meni yaşım yaşasın Awlaqda orman çaqı, Atası-anası da yaşasın Canına süygen çaqı.
⁂
Bir tawuğum bar edi qoy yimik, Qawğası bola edi toy yimik,, Yımırtqası bola edi top yimik Quymağı — tobuqğa geler yimik. Hay aman uru-uru, Qaldım quymaqdan quru.
⁂
Yañı turup kürt tawuq yatıwundan Aşamağa başladı yemin-aşın. Az da qalmay çartlağan yımırtqadan Örge bağıp cüjek çığardı başın. Aytdı tanıp anasın: — Salam aleykum, anayım!
⁂
Atiki, bitiki, Bilan darki Darki bilan, Saqtiyan. Uma xalä, Xalä, xalä, Uçup getgen, Qızım yoq.
⁂
Bitiki, bitiki, Bidan dariki Dariki bidan, Saqtiyan. Umla xaläx, Laxla xaläx Cibin derek, Danderek.
⁂
Yuxla, balam, beleley, Köp bola ay batğanı, Seni yimik yaşlanı Yuxlamağa yatğanı.
⁂
Läyla, balam, läyla. Yuxular gelsin deymen gözüñe, Yuxlap qalsın deymen özüñe. Qoluña papay da alıp, Oynamağa barsın deymen özüñe.
⁂
Yaşım meni mingen arğumaq, Ayağı kiş, boynu xoş, Qıçırğanda kökge bulut yasağan, Çıq-çılamuq geçede Sanap ayaq basağan, Batman-batman yem bergen, Badyalap suw bergen.
⁂
Läylalar etemen özüñe, Yuxular gelsin gözüñe. Yuxla, yaşım, yuxla, ullu bol, Opuraqlarıñ gelsin tiziñe.
⁂
Balam, balam, balası, Baldan tolğan xabası, Sütden tolğan çelegi, Anasını geregi.
⁂
Yuxla, balam, beleley, Aq pişewü ananı. Ösüp ullu bolğanda, Görersiz bu "tananı".
⁂
Qızım, qızım, qız tana, Qızıma gelsin yüz tana, Yüzüsü (yada Yüzewu) de aq tana, Meni qızım maqtana.
⁂
Meni yaşım altın top. Alma süyse, qızlar köp. Süye busa gelsinler, Almağanda ölsünler.
⁂
Meni yaşım yaşasın, Tatli aşlar aşasın, Yamanlağa yan bolmay, Yaxşılağa oşasın.
⁂
Ata-anabız bizge ayawlu, Şiʼru tizildi şoğar baylawlu. Ata-ananı qolundan bişgen, Kim toyup bolar bawda yemişden?!
⁂
Bir eki harmut terekde bişdi, Yaşlağa saqlay, tiydirmey tişni: — Bu harmut sağa, busu da buğar, Dörtge paylasa, bizge de qalar…
Tek, biz de dürbüz ata-analar, Üyge eltgende, paylaw başlanar, — Bu gesek sağa, busu da buğar… Altı bölükge harmut tuwralar…