Girişiw
Bu kitapçanı belgili jurnalist wa yazıwçu Soltanbek Soltanbekow yazğan. Ol mundan alda yaşlar uçun köp xabarlar, yomaqlar, şiʼrular yazıp gazetlerde wa kitaplarda çığarğan. Ullu qumuq koçap Al-Qılıçnı haqında da kitap yazıp, qumuq wa orus tillerde çığarğan.
Bu kitapçada yaşlanı iştahlandırağan, mualimler de masxara-oyun qaydalarda qollama bolağan, usta küyde yazılğan şiʼrular, söz tağımlar, çeçegen yomaqlar wa özgeleri bar. Qumuq tilni baylığın wa gözelligin bilmek uçun yaşlağa wa hatta mualimlege de bu kitapça köp kömek etme bola.
Kitapça dört bölükge bölüngen. Har bölükde bir yoruqda yaratılğan har türlü asarlar bar.
Bir-bir terekleni, gülleni, otlanı atların yaşlar çı neçik de, ullular da bilmey, qumuq tilni baylığından, ullu söz xaznasından köp sözler unutulup bara. Kitapça yaşlağa şolanı üyrenme de kömek etejek.
Sawlay alğanda, bu kitap yaşlanı söz baylığın artdırajaq, bilimine bilim qoşajaq, hatta hisapnı üyrenme de kömek etejek, ayroqda kitapdağı sanawlar qollanıp qurulğan oyunlar giççipawlanı kepine gelejek, yaşlar bawlarını, başlapğı klasslanı tarbiyalawçularına, mualimlerine klassda wa klassdan tışda yürülegen işlerde de kömek etejek.
Hali yaşlanı oxutuwda ana tilden wa adabiyatdan kitaplar yetişmeygenni esgersek, bu kitapnı ahamiyatlığı dağıdan-dağı arta. Men köp süyüp şu kitapçanı yaşlağa wa mualimlege taklif etemen.
Sayitow Abdulkerim Mahammatowiç, Anciqalada pedagogik kadrlanı bilimlerin artdırağan institutnu ana tiller kafedrasını mudiri, dosent.