БЕШИК ЙЫРЛАР

Балам балкъый бал ала,
Бал ала бола бала,
Балавуз сытып бала,
Балны авзуна сала.

⁂

Жыкъы-жыкъы бу арба
Жыкъылласын бу арба.
Иш сюймесге — юмурукъ,
Бизге тюшсюн къакъ къуйрукъ.

⁂

Уьюне къайтмагъанны
Уьюн чычкъан таласын.
Хадирасын-хумасын.
Бизин мишик яласын

⁂

Мени яшым яшасын
Авлакъда орман чакъы,
Атасы-анасы да яшасын
Жанына сюйген чакъы.

⁂

Бир тавугъум бар эди къой йимик,
Къавгъасы бола эди той йимик,,
Йымырткъасы бола эди топ йимик
Къуймагъы — тобукъгъа гелер йимик.
Гьай аман уру-уру,
Къалдым къуймакъдан къуру.

⁂

Янгы туруп кюрт тавукъ ятывундан
Ашамагъа башлады емин-ашын.
Аз да къалмай чартлагъан йымырткъадан
Оьрге багъып жюжек чыгъарды башын.
Айтды танып анасын:
— Салам алейкум, анайым!

⁂

Атики, битики,
Билан дарки
Дарки билан,
Сакътиян.
Ума хала,
Хала, хала,
Учуп гетген,
Къызым ёкъ.

⁂

Битики, битики,
Бидан дарики
Дарики бидан,
Сакътиян.
Умла халах,
Лахла халах
Жибин дерек,
Дандерек.

⁂

Юхла, балам, белелей,
Кёп бола ай батгъаны,
Сени йимик яшланы
Юхламагъа ятгъаны.

⁂

Лайла, балам, лайла.
Юхулар гелсин деймен гёзюнге,
Юхлап къалсын деймен оьзюнге.
Къолунга папай да алып,
Ойнамагъа барсын деймен оьзюнге.

⁂

Яшым мени минген аргъумакъ,
Аягъы киш, бойну хош,
Къычыргъанда кёкге булут ясагъан,
Чыкъ-чыламукъ гечеде
Санап аякъ басагъан,
Батман-батман ем берген,
Бадиялап сув берген.

⁂

Лайлалар этемен оьзюнге,
Юхулар гелсин гёзюнге.
Юхла, яшым, юхла, уллу бол,
Опуракъларынг гелсин тизинге.

⁂

Балам, балам, баласы,
Балдан толгъан хабасы,
Сютден толгъан челеги,
Анасыны гереги.

⁂

Юхла, балам, белелей,
Акъ пишевю ананы.
Оьсюп уллу болгъанда,
Гёрерсиз бу "тананы".

⁂

Къызым, къызым, къыз тана,
Къызыма гелсин юз тана,
Юзюсю (яда Юзеву) де акъ тана,
Мени къызым макътана.

⁂

Мени яшым алтын топ.
Алма сюйсе, къызлар кёп.
Сюе буса гелсинлер,
Алмагъанда оьлсюнлер.

⁂

Мени яшым яшасын,
Татли ашлар ашасын,
Яманлагъа ян болмай,
Яхшылагъа ошасын.

⁂

Ата-анабыз бизге аявлу,
Шиъру тизилди шогъар байлавлу.
Ата-ананы къолундан бишген,
Ким тоюп болар бавда емишден?!

⁂

Бир эки гьармут терекде бишди,
Яшлагъа сакълай, тийдирмей тишни:
— Бу гьармут сагъа, бусу да бугъар,
Дёртге пайласа, бизге де къалар…

Тек, биз де дюрбюз ата-аналар,
Уьйге элтгенде, пайлав башланар,
— Бу гесек сагъа, бусу да бугъар…
Алты бёлюкге гьармут тувралар…