Wa dağı da, dağı da ne zatlar neçik ölçene?
Bir qap un. Bir uwuç quwut. Qoş uwuç. Bir tuzqap habijay. Bir çorğayaq qurmaç,un. Beş çali qartıq habijay. Eki bejen buday. Üç sabu arpa. Bir sah nıxa. Bir gesek ekmek. Eki çeren buday. Bir araq biçen, yada salam. Yüz tay salam, yada biçen. Beş quyu silos, yada senaj. Bir quçaq ot. On bijaq ot. Eki qazan şapşi.
Bir stakan çay. Bir aqçalıq suw. Eki piala✻ içki. Bir pinjan✻ çay. Bir mamuraw biçen✻ Bir arşın qumaç.
Bir top qumaç. Beş dorba boyaw. On teri saqtiyan. Bir xaral yün.
Üç top mamuq. Eki xaba suw. Üç qutqa suw. Bir surayıl şerbet. Bir çepter xants.
Eki şişa tatli suw. Üç tamçı. Bir oymaq uw, ağu. Bir qutuq hürbeç, yada şişa. Dört şişa urluq may. Bir asar uwuz. Eki çelek süt. Bir xuma qaymaq. Bir top käma.
Bir şişa sarimay. Bir balon tuzlanğan xıyar, yada badırjan, qapusta.
On tuluq bal. Eki tuluq balawuz. Üç qutuq kämpet. Beş yımırtqadan quymaq.
Teren köl. Geñ maydan. Tar soqmaq. Uzun yol. Say suw. Bir baş suw. Bir tonna kömür yada: Bir kub kömür. Beş kub ağaç. Bir arba yada bir maşin ağaç. Nazik çubuq. Subay terek. Uzun qurux. Port arqalıq (uzunu 20 metrge yuwuq arqalıq). (içmay). Qulaçğa girmes terek. Yuqqa taqta. Geñ tanaw. Nataragöz (ullu göz). Uwaq gözlü elek. Biyik taw
Tik yar. Alaşa töbe. Qalın şorpa. Yuqqa çepelek. Qırçın buzaw. Egiz yaşlar. Segiz ulanlı, beş qızlı ana. Ullu yürek. Bir zalim qarqara. Bir cut ayaqgiyim. Bir opuraqlıq. Qısğa çaç. Bazıq baş. Bir töbe xapta. Bir töbe aqça. Üç yilewke sozmay Dört müyüş. Üç müyüş. Beş abat. Üçde bir (1/3) Yüzden (yüzde) yüz (100%) Onluq lampa (çıraq). Ekilik. On qabatlı üy. Qat-qat aqça. Ullu iş. Giççi zat. Qalın kitap. Bir siriw yaş. Quşlanı çeriwü. Yalqa ulaq. Yetti atası. Yetti urluğu. Yetti keren ölçe, bir keren biç!
Tergew etip qarasañ, Canlı zat barı öse. Tek ne xayır, ne amal, Sen biyiksen, men köse.
Nazik de bar, bazıq da, Arqalıq da, qazıq da. Har neni de ölçeme Hisap bilmes yazıq da.
Atdan eşek alaşa Tawdan töbe qalışa Har neni de bilmege Yaxşı yaşlar qarışa.
Sağa meni yorawum, Az aşa, uzaq yaşa. Ne zat neçik ölçene Şolanı bilip yaşa!